無論係樓市定債市，近幾年都係垃圾級別橫行無忌。上星期提到，歐洲負利率乃虛晃一招，除負利率外歐洲央行（ECB）另外一招較重要，就係取消咗證券市場計劃（SMP）沖銷。SMP其實即係買債，原理上同美國QE一樣，但ECB用唔同方法收番流動性去沖銷。取消SMP沖銷，流動性自然增加，結果歐債孳息拾級而下，西班牙10年債息一度低過美國，有冇搞錯？息口原本係反映風險，西班牙國債比美國唔穩陣，所以孳息要高過美國；做散工去銀行借錢，息口一定比做政府工高，原理一樣。但自2008年後各國用唔同方法去扭曲市場，垃圾資產變得橫行無忌。
香港樓市亦一樣，垃圾樓嘅租值回報向來都較高，因價升唔起；劏房呎租貴過半山，因業主要承擔租客走數風險。但現時港樓市同外圍債市一樣，垃圾樓同稍好嘅樓已接近無價差，大部份人已忘記本來嘅規律。追垃圾債係賭政府會企出嚟孭飛，既然任何情況下都包底，高風險就不存在風險。樓市唔同，樓市冇人話過包底。人為扭曲係一時唔係永遠，遲早都要還，所以現時追逐垃圾資產嘅人要特別小心。
Mr. Tregunter
本欄逢周五刊
出註：作者為《地利根德閣》blogger，著作有《樓市撈底攻略》