升市莫估頂！美股狂牛五歲有多，喺股市算係老坑，但至今仍有心有力，呢幾日仲好似食咗「前列爽」咁盞鬼，搞到道指連續三日破關，周三高見17139，係今年第15次新高。但近排多咗大孖沙睇淡，連聯儲局亦罕有點評個股表現，狼來了聽得多，究竟幾時爆就天曉得。不過，幾可肯定的是，聯儲局已經拍板10月終止買債，標誌退市1.0完結，儲局之後退市條路點行，9月議息會料有交代，由於涉及嘅變數較多，有理由相信，風平浪靜嘅日子有數得計。
耶倫開誠布公 數據主導
聯儲局主席耶倫發表半年度貨幣政策報告，內容其實冇乜新意，依舊話美國經濟繼續改善，但復蘇大業未完，兼且仲有好多人冇得撈，所以停止買債後，維持高度寬鬆貨幣政策係恰當做法。
雖然佢今次有補飛，話若然就業情況持續有驚喜，儲局就可能加快加息。但查實內容沒有新意，事關儲局喺近期議息聲明內，已提及退市進程由數據主導，經濟勁退快啲，反之甚至可以掉返轉行，總言之就係data dependent。
耶倫係報告內強調經濟前景唔明朗，加上儲局一直覺得就業數據有水份，除非通脹特飛猛「進」，估計儲局不會輕言加息。雖然對短期息口去年較敏感的美國2年期國債孳息近日升番啲，但從美股和美國10年期國債孳息表現衡量，市場對美息前景嘅看法無乜轉變。
事實上，正所謂民無信而不立，無論係耶倫定佢舊上司伯南克，對外講解美國經濟形勢同貨幣政策時，都給予人有碗話碗、有碟話碟的感受，唔會口是心非，厚顏地滿口謊言，令投資者安心，美股今年風平浪靜地go go go，兩人「開誠布公」的做法應記一功。
環顧本周滙市，儲局地區經濟報告褐皮書，指上月經濟持續改善，大部份地區滙報錄得適度和溫和增長，加上德國企業景氣指數跌至11個月低位，歐元昨日執筆時曾跌至1.3520美元的一個月低位，短期支持位分別位於1.35及1.3477美元的近半年低位。由於歐元區錄得龐大經常賬盈餘，加上過去八個月只試過一次收市跌穿1.35美元水平，歐元短期若跌穿1.35美元，反而可能是博反彈的機會。
高息貨幣方面，新西蘭消費物價升幅放緩，加上奶品拍賣價欠佳，紐元本周整固，昨日低見86.76美仙，較上周的近三年高位的88.34美仙，跌約150點子，短期能否破頂，取決於下周新西蘭央行是否一如市場預期加息及對息口前景看法。
奇兵
本欄逢周五刊登