巴西世界盃決賽周剛踢完，不過，近季歐洲主流聯賽買少見少嘅畸寶，噚日急不及待公佈新季有乜波播，仲話提早同歐聯續咗新約，去到2018球季；另外，亦會積極研究爭取2016歐國盃同2018世界盃決賽周嘅播映權。
以體育起家嘅畸寶，近季俾現在台搶咗唔少賽事，加埋連續失咗上屆歐國盃決賽周同巴西世界盃，佢哋新季似乎積極返啲，繼早前公佈攞到2016歐洲國家盃外圍賽，同2018世界盃歐洲區外圍賽嘅獨家播映權後，仲嗱嗱聲同歐洲足協傾續約，歐聯會去到2018球季；不過，歐霸盃玩埋今季，就唔會再喺畸寶播，邊個台會攞就暫時未知。除咗歐聯，佢哋就連首屆澳洲足總盃都唔放過，9月開始喺球彩台直播。
頭炮有皇馬曼聯睇
佢哋嘅體育副總裁曾君鳳話，距離2016歐洲國家盃同2018世界盃決賽周仲有好長時間，啱啱先攞咗外圍賽播映權，決賽周冇咁快有定案，但佢哋一定會研究，話唔定到時有機會喺佢哋新開嘅免費電視台播。畸寶今季直播頭炮，就係有皇家馬德里、曼聯、利物浦、米蘭雙雄同羅馬等多支歐洲頂級球會參戰嘅世界球會冠軍盃。此外，亦會直播晒仁川亞運男女子足球賽。