復星國際（656）老闆郭廣昌嘅投資口味確係多元化，繼之前投資英國首飾企業、美國女裝品牌、美國電影製作公司，噚日宣佈投資西班牙火腿同酒類製造商Osborne，不過就冇披露投資金額。
Osborne集團成立於1772年，喺西班牙擁有4個葡萄酒莊、兩個釀酒廠同埋一個最古老嘅火腿生產加工廠。呢間公司最近又收購咗巴西烈酒品牌。
復星解釋，內地中產人士嘅生活方式改變令到內地葡萄酒同中高端食品市場急速擴張，公司希望將西班牙火腿、葡萄酒同烈酒引入內地市場。咁啱對方都想搵強國人嘅錢，遲吓仲會派人常駐上海。
復星小股東咁就要留意明年股東會，事關復星今年舉行股東會，就學股神畢菲特旗下巴郡開股東會，喺場內擺咗幾個有份投資嘅公司攤位，等小股東了解公司買咗乜東東，話唔定到時可以試到Osborne嘅火腿同埋紅酒嘞。