有位領導人，佢唔得民心，啱啱上任就俾人叫落台，示威者仲塞住條馬路，圍佢架車，我求大俠唔係講緊689，而係新上任祖雲達斯教練嘅艾基利啫。除咗球迷唔鍾意佢，據報連中場核心派路都唔妥佢，打算離隊，去加拉塔沙雷跟柏蘭迪利。
干地唔滿意祖記嘅轉會政策，日前憤然辭職，而祖記好揀唔揀，竟然請咗上季教到AC米蘭變下游嘅艾基利。雖然A米同祖記近年冤家味冇咁濃，但A米上季喺艾基利嘅帶領下，越踢越差，佢仲中途被炒魷，相信祖記球迷都好驚球隊會俾佢由冠軍之師帶到變下游。
300球迷舉橫額抗議
艾基利星期三就任，同時就有約300個球迷去到祖記嘅訓練基地抗議。除咗舉橫額、嗌口號，當球迷見到艾基利到達嗰陣，情況混亂，佢哋包圍艾基利架車，仲封住條馬路。會方其後准許幾名球迷入去同艾基利對話，先至平息到佢哋嘅行動。
球迷除咗質疑艾基利嘅能力，可能仲不滿佢女友嘅言論。傳媒翻舊賬，發現艾基利女友歌莉亞曾經喺前年辱罵祖記係意大利之恥！喺當年A米對祖記嘅比賽，蒙達利有個合法入波被吹詐糊，賽後歌莉亞話：「祖記係意大利之恥！」仲暗示祖記同黑手黨有關，「畀頂帽同枝雪茄干地，佢就變成艾爾柏仙奴（飾演電影《教父》的主角）。」
派路率先嗌走人
艾基利唔單止俾球迷柴台，連球員都唔想同佢合作。中場指揮官派路雖然同祖記續咗約，但佢知道艾基利接任教練後，即刻想離隊。雖然艾基利喺記招度話，自己同派路冇牙齒印；但派路就已經喺自傳入面講到明，當初艾基利唔畀佢踢防中而改踢左中場，係佢離開A米嘅原因，兩人一直不和。據意大利傳媒披露，派路已經聯絡前意大利教練、現時執教加拉塔沙雷嘅柏蘭迪利，或者會喺今夏過檔土超踢波。