大家樂（341）忽然多咗一個行政總裁？講緊係公司噚日上載最新嘅年報，華華發現佢哋幫個別董事更新咗資料，除咗同執董羅碧靈續簽業務總經理嘅服務合約，仲升咗另一位執董羅德承做行政總裁（業務拓展），年薪仲由84萬元，大幅增加57%至132萬元。
羅德承之前嘅職銜係執董及集團業務拓展總經理，年報披露佢喺今年4月1日升職，雖然唔係乜嘢重大轉變，但作為一間透明度高嘅上市公司，執董職務有乜轉變都應該一早披露啩。
專欄作家周顯之前寫過，叫大家咪再掂大家樂，其中一個理由係佢哋嘅家族式管理，大家樂三名執行董事都係姓羅，首席執行官羅開光跟羅碧靈係姐弟關係，羅德承亦都係親戚。大家樂由羅騰祥與羅開睦兩叔姪創辦，羅德承就係羅開睦獨子。