粵海置地（124）唔止可以炒半年盈喜，阿爺啱啱拍板六大央企改革，重組改革正係逐步推出，呢個會係幾重要嘅主題，就好似97翻版。
講番重組注資對象，粵置股價啱啱喺一年底開步，手頭現金又超過市值，超抵搞。
粵置前身係金威啤酒，上年出售啤酒業務，變現回籠同派特別息後，手頭淨現金仍然高達31億元，超過市值28億元。粵置可謂超級銀彈，用嚟發展已經係優勢，而集團作為廣東省直系房地產旗艦，隨住阿爺拍板央、國企重組，可想而知，粵置遲早實會俾阿爺湊大。
搞地產有排升
又粵海系裏頭，粵海投資（270）揸住中、港兩地高達百億元嘅物業投資，但粵置打正地產排頭，實際上名正言順好多。
就算粵置現價1.67元，翻一番計，市值都係得56億元，暫未上到粵投嘅投資物業size。所以，如果真係action，粵置股價肯定首先要快高長大。
粵置家陣揸住啤酒廠原址，資料話總面積約500萬平方呎，座落於深圳市中心布心片區嘅黃金地段。呢批土儲，過往以廠房豆泥價入賬，禾稈冚珍珠，實際價值都未反映過。再講，阿爺嘅前海工程，開多咗條國際金融戰線，成個深圳一齊搞起，粵置日後喺呢笪地落成嘅物業，超級值租。
簡單咁重估一下，粵置NAV起碼可以上到4.25元，現價PB得0.4倍，場內地區性旗艦，珠海控股（908）0.8倍PB、深圳國際（152）上到1倍水位。買粵置，當翻半番到2.5元計，PB得0.59倍，未有耐追到珠控。
博一博粵置有大龍鳳，其實係睇佢放紙鳶，起碼係翻一番或以上嘅目標。
錢雋
細價股專家
本欄逢周二、三、五刊出