銀娛（027）旗下澳門銀河綜合渡假城嘅乳白色外牆，配金色幕牆都算係路氹地標之一，年中吸引唔少遊客留影，有內地發展商仲攞埋去做「參考對象」，喺廈門起番幢㖭喎。
讀者何先生提供相片爆料，佢前幾日喺廈門驚見一棟興建中嘅酒店，外型跟澳門銀河有八、九成似，只係規模細啲，樓層較少，差啲以為係起緊銀河二期呀。
華華問過銀娛嘅發言人，佢哋睇過呢啲相之後就回覆，指銀娛跟呢幢建築物冇任何關連，現階段未有進一步評論，並保留所有法律權利。
呢間山寨銀河位於廈門市杏林杏濱路，名為「藍海灣大酒店」，總用地面積逾4萬平方米，建築面積約5.2萬平方米。
翻查發展商廈門永同昌集團嘅網頁，亦可以見到酒店模擬圖，跟爆料者何先生提供嘅實地照差冇幾，預計投資10億人民幣興建呢間「超白金五星級酒店」，預計2012年試業，咁即係遲咗兩年？