【亂噏24 第53集】瘦即是美？鄭欣宜自有一套睇法，其身形多年來成為觀眾話題，無論肥抑或瘦，始終換來嘲笑。當年她減肥並非貪靚，也不是發明星夢，而是另有原因，她會在今集的《亂噏24》話說從頭。讀者可在http://bit.ly/appletalk24 重溫節目。
撰文：馮國康
無可否認，現代審美標準是偏向體形纖瘦，但到底是否「瘦即是美」，欣宜未置可否，但若然刻意過瘦，肯定活得不開心。她提到當年獲雜誌之邀，要從舊照片中找一張她認為最開心的相片，但在facebook找不到，欣宜說：「咁跟住摷Instagram，我見到最高𥧌230磅時候嘅我，嗰次去camping，我戴住頂冷帽，着住短袖白色T恤，喺度擺啲古靈精怪動作。但係呢個肥妹好忘我，而每個人睇到呢張相都好開心。」她不禁質問自己：「這開心女孩到底去了哪裏？」
欣宜不明白為何亞洲人會有「肥等同醜」的價值觀，又經常給予自己無形壓力逼自己變瘦：「其實點解要咁計較人哋點睇？」當然有人會問欣宜為何當初會的起心肝減肥，是否別人給予壓力？她說：「其實唔係因為俾人笑，亦唔係因為有壓力。我係比較反叛嘅人，你越叫我減，我越覺得唔需要。」到後來她逐漸成熟，更發現內涵才是最重要：「有啲好高好瘦，着衫好靚好有儀態，但你同佢傾偈，佢係冇嘢喺入面。」柳俊江相當認同：「呢個年代你笑一個人肥係好小學雞，反而相處過，你會笑佢哋啲行為或思想怪怪哋。」
肥瘦都有人笑
提到當年被指為入娛圈鋪路而減肥，欣宜不禁要在節目中澄清，更自爆減肥始末：「到我16歲生日嗰日，我打電話同媽咪（沈殿霞）講話想減肥，佢都仲『吓係咪真㗎？』。因為我睇醫生，醫生話如果你再係咁樣肥落去，會影響以後生BB，好多人生經驗會冇咗。我唔係驚冇拖拍，係驚生唔到仔，我覺得呢件事好恐怖！」欣宜外表鬼妹仔性格，但其實是不折不扣的傳統中國人，她說︰「可能大家以為我好新潮，但我喺呢個世界嘅使命就係生仔！」當堂令陳淑莊（Tanya）另眼相看。
不過欣宜因為是藝人，無論身形變得如何都會被人指指點點，欣宜卻看得很通透，從來不會感壓力：「我肥嗰陣有咁多人笑，瘦嗰陣都有咁多人笑，人哋會話『知唔知醜㗎？』、『瘦咗就以為自己好索呀？』，所以呢個世界你係please唔到任何人，你要滿足人哋去生活係好冇意思。」不過她不得不承認，靚女絕對比肥妹有着數。柳俊江即安慰她說：「短途會有着數，長途就未知，同埋靚女係會貶值㗎！但內心、智慧係會增值嘅。」欣宜認為娛圈沒有空間留給肥胖女孩：「如果大家留意娛樂圈，我哋已經冇乜空間，好多嘢都stereotype咗，女仔要好true好pure，又要有胸又有籮，就算男仔都要好陽光。我覺得呢個世界冇咁多呢啲人。」Tanya卻認為人人同一個臉孔，已分不清誰是誰︰「明星啲眼耳口鼻都開始好接近喇，我都搞唔清！」
Tanya提到從前是看肥姐沈殿霞的電影長大，突然發現欣宜的一舉一動跟肥姐如出一轍。其實欣宜一向「豪邁」，只是當日擔任纖體公司代言人，公司為她營造了公主造型，才會有人誤會她的性格，她說：「可能我講嘢表情手勢好誇張，人哋以為我唔知醜！但我一直都缺乏自信，點解我咁鍾意講笑？其實都係一種defence mechanism，我笑咗自己先，你就冇權笑我。」柳俊江不禁自爆：「我都係喎，我細個都係大肥仔，六年班都36吋腰㗎！」欣宜狀甚不屑的說：「36吋濕濕碎喇！」Tanya也自稱從前是肥妹一名，曾試過130磅，至今仍有「肥人後遺症」，她說：「大家肥過就知，以前隻手磨擦得多會損，所以慣咗『啞』開嚟行！」
欣宜突然不再減肥，是否發生了一些事情，柳爺單刀直入發問：「會唔會係男朋友呀，或者男仔呀？」欣宜爽快回應：「首先，如果有男仔因為我肥而唔鍾意我，咁就算喇！我都一定唔會鍾意佢！其實我覺得我內在美好靚，係索女嚟，哈哈！我對於我份人，我覺得係靚，但你話樣，就拜拜！」Tanya直言覺得欣宜樣貌自然，予人舒服之感，亦覺得她比同齡女子有智慧得多。
只想娛樂大家
欣宜最近簽約蕭定一公司，她講明不會減肥，她解釋說：「我覺得你唔應該因為肥同瘦去決定請唔請一個人，係要憑佢做嘢嘅ability同態度。點解大家覺得我肥咗就覺得我自暴自棄？就會覺得你好懶？」柳俊江問她可有因為體形問題而流失了黃金機會？她說：「從來都冇，因為從來黃金機會都冇畀過我，因為我從來唔夠瘦！但係I don't care！」她續說：「大家以為我發明星夢，或者花阿媽留畀我嘅錢，過一啲五光十色嘅生活，但其實我好鍾意娛樂大家，無論唱歌又好，演講又好，扮嘢都好，我好鍾意令到大家開心。」不愧為開心果的女兒。
肥人冇罪 欣宜搞起肥妹革命！
http://bit.ly/talk245301
唔使郁啲都話減 肥都有生存空間
http://bit.ly/talk245302
減肥好鬼慘 欣宜︰「其實我冇自信」
http://bit.ly/talk245303
畀人笑得多會自卑 笑返自己就ok？
http://bit.ly/talk245304
潮流興玩閃避球 明星都有高手？
http://bit.ly/talk245305
靚女會貶值 肥人先有競爭力？
http://bit.ly/talk245306
突然唔減肥 欣宜︰「我都有內在美！」
http://bit.ly/talk245307
癡肥易有併發症 隨時冇得生？
http://bit.ly/talk245308
唔係發明星夢 欣宜：「淨係想娛樂大家」
http://bit.ly/talk245309
咬字唔清有得練 講嘢習慣變一變
http://bit.ly/talk245310