激進投資者伊坎成日入股企業之後多多聲氣，逼啲高層聽佢支笛，有人批評咁只會令高層想做嘢時綁手綁腳，對公司唔好；不過伊坎就話，就係因為企業管理層多蠢材（morons），所以先要有人𥄫實佢哋。
伊坎最近喺一個會議上話，好多企業嘅問題，係用錯人去營運公司；企業高層靠政治手段上位，晉升高層後，為咗穩住個位，只會提拔更蠢嘅人，第日就係呢班蠢材管理公司。佢話如果自己係財長，就唔會畀呢班人做高層；美國要擔心嘅係企業高管，唔係印銀紙。
伊坎向好多企業出過手，包括蘋果、康寶萊等。佢之前入股康寶萊後，都有批評過公司嘅管理，仲因此同另一投資者艾克曼展開罵戰，搞到勢成水火。不過商場上係冇永遠嘅敵人，兩人喺5月時突然friend番；今次會議，主辦單位請咗艾克曼，伊坎講講吓艾克曼仲突然走出嚟，兩人互抱一下，假到呢！