一年一度嘅ESPY頒獎禮喺周三晚舉行，每年呢個時候都係星光熠熠，除咗運動員之外亦有唔少明星嚟到捧場。
今屆ESPY頒獎禮繼續喺洛杉磯舉行，今次由加拿大饒舌歌手Drake做主持人。ESPY頒發嘅獎項幾乎拍得住香港某歌曲頒獎禮，各獎項係體育迷透過《ESPN》網站投票選出，都頗有分豬肉味道。俄羅斯嘅舒拉寶娃獲選為「最佳女網球員」，佢亦帶埋男友狄美托夫親自到場；舒娃以一件黑色連身裙到場，高貴得嚟又唔會老土。
杜蘭特膺最佳男運動員
除咗舒娃之外，到場嘅體壇明星仲有美國國家足球隊嘅丹普西，同埋效力NBA雷霆嘅杜蘭特。丹普西都叫有份獲獎，「最佳一刻」獎項，網民選咗世盃分組賽美國贏加納呢場波，丹普西仲喺開賽冇耐就先開紀錄，助美國最終2:1贏波。至於杜蘭特就仲威，獨攬「最佳男運動員」同埋「最佳NBA球員」兩個獎項，佢喺拎獎嘅時候，又再一次多謝媽媽同埋佢隊友韋斯卜克，真孝順又夠義氣；韋斯卜克亦有獎拎，獲得「最佳捲土重來」獎。另一個獎項「最佳決賽表現」就由總決賽MVP，馬刺嘅尼納特贏得；而教練普波域治就獲選最佳教練。
當晚頒發嘅獎項多不勝數，其餘獎項包括有：基斯坦奴朗拿度獲選「最佳國際運動員」；「最佳男網球員」係拿度；同埋「最佳拳手」由美韋特贏得等等。
