要知港府口中嘅「主流意見」是如何練成的？問下四叔就知。煤氣（003）竟然記名叫員工簽反佔中表格，同放把刀上員工頸上問佢簽唔簽有乜分別。遲吓唔知會唔會有冇醒目仔有樣學樣，寄出水、電、煤單時，順手寄埋張表格畀百姓呢？
噚日唔少股仔炒上去，包括升近6%嘅天工（826）。天工周二發通告，向宏易資本發1年期認股權證，涉7,000萬股，相當經擴大股本3.47%。呢份通告係一個好大嘅啟示，大家應仲記得熔盛（1101）同中海船舶（651）嘅故事嗎？兩公司先後於2及5月發CB後就開車。今次認購天工批認股權證嘅宏易資本就勁啦！因揸旗嘅正正就係有份接前述兩間公司CB嘅王平。王平背景非凡，因為佢同「炒底王」鄭建明所控制嘅私募基金，最後都係由傳奇富豪、巨人集團董事長史玉柱，及中行（3988）認購。牌面睇，三位仁兄根本係同一幫人；的而且確，熔盛最後亦真係獲史玉柱家族、中行認購另一批CB。天工4月俾內地一份雜誌質疑佢盤數，股價最多跌到去1.11元後急反彈，而家已逼近4月出現大陰燭前嘅水平。再者，今次天工搵到一個做開世界嘅大碼頭，絕對有可能係熔盛、中海船舶翻版。天工最新市值29億，比熔盛123億細粒好多，要炒起上來更易。批認股權證行使價1.7元，當炒夠一個開吧，都去到3.4元。
Fifi
http://www.facebook.com/lovefrystock
本欄逢周二、四刊出