利物浦喺周二宣佈，嚟自賓菲加嘅翼鋒拿沙馬高域正式加盟，成為球隊今夏第4位新兵。紅軍喺世盃期間將麻煩多多嘅蘇亞雷斯賣畀巴塞隆拿，收番7,500萬鎊，使使吓簽咗4個新球員之後，原來已經差唔多使晒。睇番上年熱刺賣走加里夫巴利收咗成8,500萬鎊，用嚟買咗一堆球員，結果當中唔少都係唔啱使，仲搞到成績不升反跌，希望紅軍唔好步熱刺後塵。
馬高域今夏第4簽
20歲嘅拿沙馬高域上季先加盟賓菲加，呢位塞爾維亞進攻球員過去一季踢咗26場葡超入得5球，主要都係當翼鋒用，紅軍希望佢可以加強球隊側擊力。佢身價一啲都唔平價，要成2,000萬鎊，計埋之前簽落嘅列基林拔、拉爾拉拿同埋安利簡恩，4個新兵加埋已經用咗5,900萬鎊（見附表），賣走阿蘇收番嚟筆錢已經使得七七八八。
聽講來季有份踢歐聯嘅利物浦仲未打算收手，新目標包括史雲斯前鋒韋菲特邦尼同守將賓戴維斯，以及同阿仙奴傾唔掂數嘅昆士柏流浪前鋒雷米。據報史雲斯嫌紅軍開價800萬鎊斟賓戴維斯出手太低拒絕咗，鬼咩，見你賣咗阿蘇收番咁多錢，仲唔當你水魚咩。
賣巴利買水貨似曾相識
賣走陣中球星，將收到嘅轉會費用嚟羅致新兵，其實絕對係一件好事，但紅軍球迷最擔心係一班新兵啱唔啱使。上季熱刺賣咗巴利執成8,500萬鎊，但買番嚟嗰堆球員，有幾位簡直係笑話嚟，尤其係最貴嗰兩位____淨識射12碼嘅蘇爾達杜，同完全適應唔到英超嘅拉美拿。當時領隊波亞斯事後話過有啲球員唔係佢心水，但球隊成績唔好都係要佢孭鑊，半季左右就俾球會炒咗；今季利物浦人腳變動咁大，又要兼顧英超同歐聯，領隊羅渣士真係要醒定啲，一旦交唔到成績，隨時步波仔後塵。
至於離開咗利物浦嘅阿蘇，早兩日已經靜雞雞去到西班牙，宣佈正式簽約；由於佢目前仲受緊處分，唔可以出席足球相關活動，所以巴塞想同佢搞公開歡迎儀式都唔得，要等到10月先解禁。