繼舊年初有人冒認金管局總裁陳德霖寄電郵嚟，話有單價值4,710萬美金嘅生意同我哋傾，近日又到A貨渣打行政總裁冼博德寄電郵嚟《蘋果日報》，話希望同我哋合作搞單總值55萬億英鎊（即係730萬億港元）生意，仲留埋手提電話號碼，好有誠意。
呢個手提電話區碼係英國嘅+44開頭，同渣打總部英國脗合，A貨冼博德話喺呢單刁會投資60%，叫我哋覆佢，但呢啲擺明騙局，都唔知仲可以呃到咩人。
華華做過些少資料搜集，發現冼博德唔係第一次被冒認行騙，甚至有專門介紹對付垃圾電郵（spam）及騙案（scam）的網頁joewein.de LLC，以早前冼博德名義行騙嘅電郵做範本，連電話號碼同埋交易金額都一樣，華華懷疑騙徒掛住睇世界盃，冇乜精神同心機去創新。