為甚麼在大學生多過𡃁模、月薪低過女明星心口deep V的情況下，社會仍樂此不疲的吹捧這些「大學爭住收」的五星星狀元呢？
那些勸學生不要太注重學業成績的「良言」，其實都是「流言」。
流言一：喬布斯、蓋茨都無讀大學，讀唔到大學，駛乜驚？
原因：以個別成功人士作例子，無說服力，因為家長可以舉出「街邊送貨嘅阿強同推車仔嘅阿明，都無讀大學」來證明讀唔到大學有排驚。
更重要的是，喬布斯蓋茨佢地係「唔讀」大學，而唔係「讀唔到」大學（兩個都係中途輟學）；「節食」同「捱餓」，主動性爭好遠。
如果劍橋哈佛搶住收你個仔，而佢撕爛張入學通知書，咁佢就可以講呢啲：「喬布斯蓋茨都無讀大學」。
流言二：考試成績只係衡量個人表現的其中一環，而並非全部。
原因：無錯，如果你有吳彥祖咁靚仔、周秀娜咁好身材，你的確可以唔用成績去同人比拼。
譬如黃之鋒，考得唔好，但有超強人氣同龐大的社會動員力，我真心覺得佢唔需要介意考試成績，因為我投學民思潮方案，同埋響應號召包圍政總嘅時候，並唔係因為佢考咗幾多粒星，而因為佢係黃之鋒。
同樣，當我畀中指嗰啲衣着妖冶、眉來眼去嘅政治人物嘅時候，係唔會因為佢係乜乜大學嘅博士而姑息佢。
但如果，你無其他才能呢？咁你就應該問吓自己，除咗成績，仲可以用乜嘢嚟同人比拼？
個個都笑𡃁模胸大無腦只能做花瓶，但點解咁多人仲仆住去整容隆胸？因為佢地明白，笑還笑，你只要拋條事業線，記者一樣爭住影；五星星的確好膚淺好表面，但sorry，呢個社會，一樣爭住睇。