好多IT人想去Google、蘋果公司呢啲科技界龍頭工作，貪公司個名夠響，講出嚟都威啲。不過講到追女仔，呢啲企業嘅員工就唔夠亞馬遜嚟。
Hinge係一個專門撮合年輕專業人士嘅社交app，根據個app嘅數據，亞馬遜員工魅力冠絕行家！用戶睇完亞馬遜員工嘅資料，想進一步了解嘅，較平均多14.2%。
同屬科技公司嘅微軟、Google同facebook，雖然名氣勁過亞馬遜，但都只係較平均比率分別多8.2%、7.2%同2.3%。至於蘋果就仲衰，平時啲產品、股份等等咁搶手，員工竟然係籮底橙，員工吸引力仲低過平均值。唔通喺蘋果做嘢太忙，做到殘晒所以魅力大減？
不過多狂蜂浪蝶唔代表就要吊高嚟賣，同樣根據Hinge數據，呢5間科技公司中，亞馬遜員工係最少拒絕有心人，比率較平均低14.8%；微軟都係排第二，較平均低0.5%。Google同蘋果分別較平均高0.2%及0.5%；最醃尖嘅係fb員工，拒絕人比率較平均多7.5%。