為海洋公園服務11年嘅盛智文早前「被卸任」主席一職，都有同老友、觀瀾湖主席朱鼎健呻過呢件傷心事。朱鼎健說，訴苦嘅內容，同大家喺新聞睇到嘅100%脗合。
但唔使可惜盛智文啲鬼馬主意冇空間發揮，朱鼎健透露兩人喺海口合作嘅蘭桂坊項目即將喺年底開業，10月底會第二次喺嗰度搞萬聖節派對造勢，規模會盛大過上次。佢雖然平時比較嚴肅，但舊年都肯跟住扮演殭屍嘅盛智文，變身加勒比海盜，話自己其實接受到新玩意，唔係咁古板。睇嚟盛智文喺海洋公園未竟嘅創意，可以轉晒過嚟。
朱鼎健繼承父業後經常亮相宣傳項目，但佢對新項目地點、收入和土儲等呢啲基本資料，以未上市為由三緘其口，話唔需要同股東及社會交代。不過佢提到上市就說不遠矣，都好矛盾吓喎。