「魔童」王維基（Ricky）一向被公認係橋王，點估到佢搞網購竟然被員工話太out，頻頻俾80後、90後ban橋，仲話有同事大膽「進諫」，話𠵱家個世界唔係淨得老闆講晒，員工都應該有say。
Ricky噚日出席書展活動，乘機幫港視（1137）嘅網購大計做宣傳。年屆50有多嘅Ricky話，自己最初只係諗住簡單咁「一買一賣」，但就俾班80後、90後話唔work，應該加強「互動性」，有得sharing先係王道。但佢就好口密，唔肯講網購嘅細節，只係話希望年底可以正式推出市場，喺適當嘅時候先會公佈喎。
早排有位唔肯透露姓名嘅大型零售商，話唔會睇好呢盤網購生意，Ricky噚日私底下就同華華講，個生意模式work唔work就見仁見智，「有興趣參加嘅咪參加囉，冇興趣參加嘅咪唔參加囉。」
曾經諗過搞電子書
除咗講網購，佢仲自爆話喺6年前，仲係香港寬頻主席嗰陣，曾經諗過收購3至4間教科書出版商，攻打電子版教科書市場，但諗落都覺得有政策風險，話當時政策冇咁好，教育局唔會審批電子教科書，之後唔知係咪觸景傷情，講咗句「如果網劇都俾人趕盡殺絕嘅話，可能連電子書都做唔到！」
佢仲暢談對「書」嘅睇法，講咗幾句有骨嘅說話，不時仲強調無論係電子商貿，定係電視劇，都應該要保留香港文化特色，唔可以單單只遷就內地口味，「搞得文化，就預咗冒險。」
李華華
mailto:[email protected]