麥兜都有教小朋友唱「誰人身體感不適，就要響屋企休息」，噚日立法會教育事務委員會本年度最後一次會議，教育局局長吳克儉親自出席，但就戴住口罩，唔係又驚講錯嘢啩？委員會主席林大輝揭開謎底，話局長變咗感冒鳥！
會議之初吳得掂都仲ok，直至第五個發言嘅葉劉淑儀問佢，幼稚園嘅牟利同非牟利查實係憑咩準則？吳得掂答答吓，葉劉聽到唔對路，反問：「茂利同非茂利？」令在場唔少人士發笑。可能吸取咗教訓，吳得掂其後逐字表明政府「並。無。改。變」小班教學嘅立場。據知吳得掂病咗一兩日，噚日仲咳，所以要戴罩，但佢習慣唔請病假，所以帶病返工囉！