隨住世界盃曲終人散，一眾參戰國腳終於可以小休吓，叉叉電準備新球季。好似上個禮拜以3,000萬鎊由巴塞隆拿加盟阿仙奴嘅智利前鋒阿歷斯山齊士（左）唔使煩轉會嘢，就可以盡情同女友Laia Grassi（右）到墨西哥海灘度假，Laia仲着住火辣三點式泳衣，山齊士真係爽歪歪。
不過玩還玩，千祈唔好學佢嗰位新隊友韋舒亞咁，喺拉斯維加斯度假期間扯煙（小圖），搞到球會震怒，睇怕佢遲啲返到阿仙奴實會俾領隊雲格照肺，仲可能會受處罰㖭；至於前阿仙奴左閘艾殊利高爾上年都試過喺度假期間扯煙「斷正」，俾車路士領隊摩連奴話過，已經轉投羅馬嘅佢就以「過來人」身份，勸韋舒亞戒煙，唔係球員生涯會好快玩完㗎。
至於槍手另一位中場奧斯爾就生性得多，本身係回教徒嘅佢，決定將35萬鎊世界盃獎金，捐畀目前受以色列軍隊攻擊嘅加薩地帶嘅小朋友。