中環OL如果想跟紙糊熊貓影相，唔使大熱天時，身水身汗走上去中環鴨巴甸街PMQ元創方嘞，嘆住冷氣喺寫字樓大堂影相都得。事關中環大業主置地過去三星期舉辦咗「香港製造」紙糊熊貓工作坊，搵咗一班香港市民製作1,600隻紙糊熊貓，呢批熊貓將於本月18日（周五）至8月3日期間，喺置地旗下三個物業展出。
話明係香港製造，呢1,600隻紙糊熊貓並唔係早前由法國藝術家Paulo Grangeon製造、曾經喺香港周圍快閃嗰批。佢哋現時入晒箱，呢幾日就會陸續開箱，放喺置地旗下三個地方，包括交易廣場中庭、遮打大廈大堂同埋置地通往歷山大廈嘅西橋。早排遇不到快閃熊貓、又冇去到元創方搵佢哋嘅中環人，可以返工放工路過影番幾張相嘞。