特首狼英噚日係威係勢咁率領政改三人組見記者交代政改報告，身為佢愛將嘅新聞統籌專員、即「白宮發言人」兼「金鐘仁」馮煒光亦陪住主子出動，喺記者會上「指點江山」。
馮煒光經歷處男作因為講唔出記者名以及亂點記者發問捱轟後，終於有「改善」嘞，佢會前透過政府新聞處職員私下表明，唔會叫記者名，以免順得哥情失嫂意，只會形容被點記者嘅衣飾喎。有現場記者即時訕笑，話正牌白宮發言人嘅傳統，通常係好熟悉白宮記者嘅名，馮煒光咁做有啲枉稱「白宮發言人」喎。
好戲還在後頭。話說期間有外籍記者舉手發問，而馮煒光依舊用中文話：「最後嗰行嗰位外籍人士！」現場人士話嗰位獲欽點嘅記者最初都唔知自己獲提問機會，似乎馮煒光喺主持記者會上仲有好多改善空間。