喺街撞到名人好多人都試過，不過好少可以一撞就撞到兩個神級人馬。住喺股神旗下巴郡總部奧馬哈嘅16歲Tom White就係咁好彩，佢星期日晚同朋友出街玩，竟然巧遇股神畢菲特同神級音樂人保羅麥卡尼！
兩個唔同界別嘅人一齊出現，真係幾奇怪。阿Tom見到兩人坐喺雪糕店eCreamery外面嘅長椅上傾偈，確認自己冇眼花之後，就即刻叫朋友幫佢影張相，跟手喺Twitter度share示威！睇相，阿Tom豎起手指公，畢菲特同保羅麥卡尼就喺後面好似佈景板咁。
阿Tom引述保羅麥卡尼保鑣話可盡情影相，但就唔可以握手同簽名。原來保羅麥卡尼去當地開演唱會，當日約咗股神同股神千金Susan食飯，然後去食雪糕。餐廳同eCreamery嘅負責人都猛讚保羅麥卡尼有禮貌，好符合爵士銜頭咁話。咁究竟佢哋傾乜？講投資定係股神成日玩嘅夏威夷小結他？