【曼谷直擊】王晶執導的《賭城風雲2》昨日繼續在曼谷取景，周潤發、張家輝、余文樂（樂仔）、曾國祥、文凱玲、朱晨麗及內地小演員王詩齡（Angela）都有參與拍攝，昨日繼續拍攝家輝帶着Angela逃亡戲份和拔槍爭執場面，亦是發哥首天開工，他和攝製隊在一條叫Phasi Charoen河旁邊的大牌檔拍攝，當他看見著名的泰國河粉攤檔，他立刻請現場工作人員一起分享美食。
心情愉快的發哥邊吃邊對記者說：「呢度風光如畫，又有我最鍾意食嘅泰國河粉，又喺河邊，好有意思。」今次發哥會在泰國逗留3個星期，在曼谷拍攝個多星期後，大隊會轉到芭堤雅拍攝，他表示：「芭堤雅主要同劉嘉玲拍一啲遊山玩水嘅戲份，都成廿幾年冇同嘉玲合作喇，對上一次係舞台劇。」問發哥戲中要應付危險動作戲嗎？他說：「頭先好危險喇，又槍林彈雨，又踎低又跳高。聽日會有快艇追逐嘅場口，替身特技人都會準備好，應該冇乜難度。」
攝製隊昨日拍攝家輝帶着飾演女兒的Angela在Phasi Charoen河旁邊的大牌檔覓食，但發現余文樂等國際刑警在追蹤他們，於是想製造混亂，搞到當地陀地與國際刑警起爭執幾乎要拔槍，家輝見樂仔等刑警無暇顧他，立刻趁機落河上快艇閃走，賭神看到家輝上艇後，也立即上另一快艇追截。
家輝昨日拍攝長尾艇追逐戲份時，見Angela的替身顯得緊張，全程攬實她，他說：「梗係要啦，啲艇都有速度㗎！點都要照顧個細嘅，跌落水點算。」
家輝樂仔緊張
在拍攝現場的發哥十分輕鬆和開心，反而首度與他合作的張家輝和余文樂就有些緊張，家輝表示：「同呢種神級前輩合作，當然會緊張啦！」樂仔就扮鎮定說：「都係工作，不過當然係期待同發哥做對手戲啦！」
此外，曾國祥在戲中演刑警，昨日他在河邊拍攝拔槍戲時就發生搞笑場面，因現場地下是又爛又疏窿的木板，下面又是河，豈料他手拿的道具槍的子彈匣鬆開了，子彈直接跌落水，結果要NG重拍，他說：「搞到俾導演鬧，下次要小心啲！」
採訪：張俊銘
攝影：沈健程
