霍啟剛早前以香港青年聯會主席身份，拉大隊去灣仔警署交信撐警察後，噚日輪到佢老婆前跳水皇后兼國寶郭晶晶出動，以聯合國兒童基金香港委員會大使身份，帶住卅幾個餵哺母乳嘅媽媽，向食物及衞生局局長高永文交信，但封信唔係撐高永文，而係想政府規管奶粉商不良銷售手法。退役後嫁入霍家做少奶奶嘅晶晶好支持母乳餵哺，透露舊年8月囝囝中曦出世後都係食人奶，希望當局加強母乳支援同社區配套。
追唔追多個順其自然
晶晶噚日同高永文開會時話，母乳係小朋友最好嘅營養，想推廣令到更多BB食人奶，但𠵱家奶粉廣告太氾濫，人人都以為食奶粉先係正常，搞到每個朋友都問佢食邊隻奶粉。佢仲自爆坐月期間，囝囝半夜想食奶，陪月員唔忍心叫醒佢，試過沖奶粉就算，最後喺佢堅持下先冇打亂母乳餵哺大計。
有長輩同晶晶講囝囝好似好瘦，唔似其他BB咁肥肥白白，但晶晶強調囝囝好實淨，到𠵱家都冇乜病過，各方面發展都好好，打算餵到佢自然斷奶。至於會唔會追多個仔或者女，佢話「咁就順其自然啦」。
一齊開會嘅仲有前港澳辦副主任陳佐洱個女、聯合國兒童基金香港委員會主席陳晴。同樣係母乳媽媽嘅陳晴話，個個都讚𠵱家3歲大嘅囝囝精靈活潑，以前喺香港出街餵人奶嗰陣試過俾人「睥」，但呢幾年情況似乎已經有所改善，佢都希望政府喺公眾地方設立哺乳空間，又建議僱主提供雪櫃畀女僱員儲備母乳。
高永文接信時就同幾個小朋友玩到不亦樂乎，有個小朋友影完相後唔捨得走，挨住局長嗲咗一陣，最後由媽媽抱走。局長話好同意媽媽嘅訴求同論據，下星期會去立法會反映意見。
李八方
mailto:[email protected]