噚日尾市，國資委公佈咗央企改革試點名單，裡面有國藥（1099）、中建材（3323）嘅母公司同中糧集團、中節能等等。事實上，中糧、中節能旗下幾間上市公司以至中建材，一係欠債纍纍，再唔係就經營不善，總之唔係優質企業，阿爺似乎想搵幾間低質央企嚟做試點。好似中建材咁，債台高築已經不能再拖，橫死豎死，索性先搵佢嚟改革做吓白老鼠，搞掂就梗係好，到時證明央企改革行得通，可以copy去其他央企。就算最後搞唔掂又唔會肉赤，呢啲劣質央企衰咗咪當少咗一間，肉赤嗰個，只會係上市公司小股東啫，所以唔好諗住試點一定掂。
所謂央企改革，暫時唔談得上有具體內容，最關鍵個point係「因企制宜、一企一策」，換言之係度身訂造幫央企做改革，其中，中建材阿媽同國藥母公司就有份搞混合所有制，簡單啲講，就係引民資入股佢哋嘅業務。晉佳唔止一次講過中建材負債重到不得了，嚿年底淨負債比率456%，嚴重資不抵債，阿媽照計亦唔好得去邊，搵民資入股佢哋項目，係咪搵笨都係未知之數，所以單一個混合所有制，絕對不能救全家，股價上升，係博中央仍有後着。對於中建材嚟講，原本負債太重，利息高昂，水泥行業又唔係好景，公司真係四面受敵，業績前景難見曙光。而家中央搵到個理由出手幫中建材阿媽，擺到明係冇包袱地強勢干預，原因係近年中建材同中糧系股價咁差、一潭死水，睇怕阿爺做乜手術，都唔會有股東出嚟反對。按道理由原本前景不見天日，變成有番一線曙光，已經有值博空間，睇噚日市場反應，晉佳亦認為有得繼續炒，中短線未必太差。
試點純粹白老鼠
如果以央企改革為理由，而買入中建材、中糧系長揸……件事要重新計過，講到最尾，咪又係買個信字，只要大家齊心信中央，件事就變得有價值。吓，唔係吓話！又要信中央多一次？四萬億、三中全會，長線投資者信完都談不上有好結果。點解國企去到今時今日估值咁低殘，一嚟阿爺一早已經碌爆卡，講乜嘢大家都已經唔想信，邊個焗住信？咪係嗰班揸到成手貨嘅外資囉。
冷靜諗諗，暫時唔好俾中央花晒嘅track record蒙蔽住。有兩點值得注意，第一，噚日央企改革記者會只得國資委改革辦主任彭華崗見記者，國資委主任張毅唔見人，似乎中央重視極有個譜。第二，央企改革試點公司名單裡面有一間叫中糧集團。一直有傳聞，中糧集團喺政治上處於不利位置，如果搵一間咁嘅公司嚟做白老鼠……試點長遠睇怕唔係好嘢居多，晉佳就唔打算買嚟長揸了。
晉佳
本欄逢周三刊登