為咗升職加薪，打工仔可以去到幾盡？有求職網站嘅調查發現，本港有22%嘅金融專才，曾經以辭職威脅老闆加人工或者升職，比例明顯比起新加坡（12%）同中國（4%）高，盡顯香港人積極進取嘅一面。
但又吹佢唔脹喎，事關曾經跳草裙舞嘅受訪者中，竟然有78%得米，成功率奇高。事實上，呢班金融專才對自己嘅價值亦十分有信心，逾六成受訪者認為僱主會緊張自己點解唔想撈，原因包括冇人頂替到自己、同上司關係好、令上司工作量直線上升等等。
雖然呢招破釜沉舟疑似好有效，但專家就話，咁樣會直接影響自己同上司之間嘅互信關係，係升職加薪彌補唔到嘅，所以絕對唔建議大家咁做。咁又係嘅，正所謂天生我才必有用，有料嘅自自然然會平步青雲啦。