記得以前內地幾間電訊公司嘅老總，耐唔耐就會玩音樂椅，A公司老總調去B公司做老總，B公司老總又會去C公司做老總，個圈子轉來轉去都係嗰班人。噚日小米創辦人雷軍旗下金山軟件（3888）宣佈，魯光明辭任獨董，接替佢嘅，係幫過馬雲旗下阿里巴巴集團做財務副總裁嘅王舜德，難道科網圈子都係咁細？
王舜德2012年曾經喺金山軟件打工，由於佢之前嘅老闆係馬雲，市場當時對於金山能夠請到阿里前高層做掌櫃大為看好，可惜唔夠一年，王舜德就因個人原因辭職。
王舜德家陣係中信資本嘅顧問同埋運營合夥人，睇嚟當年辭職就係為咗做芬佬，今次回歸金山做獨董，唔知係咪主席雷軍意思呢？睇番金山另外兩位獨董武文洁同鄧元鋆，分別係美國上市公司攜程網（Ctrip）首席戰略官同埋歡聚時代（YY）嘅獨立董事，科網公司都鍾情有科技公司背景嘅人做董事，起碼知道乜頭乜路吖嘛。