勝利管道（1080）貼住09年上市以嚟低位，比上市價2.2元潛水過70%，隨住阿爺油氣管道大計展開，勝利管道翻身，又有得諗。勝利管道係內地少數可以生產大管徑、大厚壁，可以承受高壓，兼獲大型油氣商採用嘅唯一一間民營管道生產商。
上年，內地管道行業經歷阿爺換屆，同石油sector高層墜馬，成個油氣管鋪設大計延後。但內地天然氣幹線管道，講緊得四萬幾公里，只有好似美國呢類成熟體天然氣管幹線嘅10%。
內地新領導上場，講明整治霧霾，環保行先，但天然氣管鋪設，嚴重落後。隨着管道鋪設重啟，滯後建設需求一釋放，包括勝利管道在內油氣管道商，已經有運行。
PB平同業一截
勝利管道上年受大圍環境影響，純利得1,783萬元人仔，但純利基數細，今年一回復增長，就會好爆炸。上年下半年，勝利管道所接定單已經係上半年嘅3.3倍。直到上年尾，勝利管道手頭定單近10萬噸，亦超過上年上半年嘅8.8萬噸，照計，最快嚟緊上半年，最遲亦應該喺今年度，張成績單可以turn around。勝利管道憑住技術優勢，喺行頭低迷期，谷底搶閘，應更快彈出。
再講，阿爺亦規劃「十三五」期間，油氣管鋪設長度，要達到30萬公里，管道商中線繼續有排玩。勝管呢個超殘價（0.52元）得0.5倍PB，內地行家玉龍上到兩倍、金洲管道1.6倍，勝利管道平咗一大截。場內天大管材（839）呢期炒行業性復蘇，半年累升咗近60%，勝利管道同期仲係緊潛水，落後到痹。
小注怡情買勝管，追貼天大，博翻半番到0.78元，PB都係得0.8倍，仍未有耐追到內地行家。
錢雋
細價股專家
本欄逢周二、三、五刊出