各位朋友！又係我馬華力，今次同大家玩嘅係人有相似。原來馬圈中都有唔少騎練同好多人好似，其中馬華力覺得最神似係孫達志同盜墓迷城入面嘅奸角炎皓鐵，炎皓鐵就奸到出汁，好在孫達志都唔算好難捉嘅練馬師，上季仲可以贏夠15W上岸，恭喜晒佢。
另一位似明星嘅馬圈中人係梁家俊，睇睇吓佢真係有幾分似羅仲謙，兩個都好靚仔，而兩人另外相似之處都有位靚女女朋友，咦！楊怡同阿Kit都有幾分似，祝佢哋各自都可以搵到幸福。
我哋嘅孝順練馬師方嘉柏其實同桌球名將，有火箭之稱嘅奧蘇利雲亦好相似，其實呢兩位大哥喺自己事業上都曾經登上高峯，呢點亦係佢哋相似之處。咁啱奧蘇利雲有張相同桌球名宿戴維斯一齊影，勢估唔到戴維斯同大摩都好鬼似。