世界盃曲終人散，四年後各足球強國再在俄羅斯一決雌雄，到時不知鹿死誰手，只有一樣是肯定的，就是中國隊不會圓夢，香港隊也不會有資格參戰。
世界盃進入八強賽事之後，左丁山估賽果只中了一半，進入四強之後，更獲朋友封為「燈神」，貼邊隊輸邊隊，話荷蘭贏阿根廷，輸咗，話巴西贏德國，面目無光，話巴西攞番個季軍安慰獎，連眼鏡都碎埋。最後冠軍決戰，一於買全場和，阿根廷攞冠軍（即係憑加時或十二碼取得勝利），點知到第113分鐘，都係輸埋，其實阿根廷係有機會贏嘅，但上半場希古恩單刀射失，下半場美斯在禁區射斜，加時下半場柏拉斯奧面對紐亞，竟然又打飛機，卒之俾德國憑一個機會就由葛斯一控一射入網，拿得冠軍，唔怪得BBC網有球迷話：「阿根廷泰維斯應在球場，而唔係喺迪士尼樂園！」阿根廷三個前鋒希古恩、阿古路、柏拉斯奧都完全失準，走動既少，亦不配合美斯，教練沙巴拿寧願要柏拉斯奧而放棄上季在祖雲達斯踢得幾好嘅泰維斯，實在失策兼要負責任。
但負上最大責任者就係竟然得到金球獎（最佳球員）嘅美斯，其實今屆最佳球員係荷蘭洛賓至啱，此君大器晚成，23歲踢車路士一無是處，係一個容易受傷的男人，估唔到到咗30歲竟然在世界盃大放異彩，進攻威力驚人，只係荷蘭入唔到決賽，冇法啦。美斯最近三場比賽只憑名氣震懾對手，永遠有兩三個後防跟住佢，步步為營，可憐嘅係，美斯體力不支，心理責任重大，雙腿有百斤重，成日在球場上行行企企，阿根廷與球迷期望佢憑一人神力，摧毀對方，不過係空想。馬勒當拿嘅人影將細小美斯遮住晒，1986嘅馬勒當拿，永遠係美斯之惡夢。那一年馬勒當拿一個人踢走英格蘭（入兩球贏二比一），在決賽帶領阿根廷結果以三比二氣走西德，登基成為球王。今屆球迷期望美斯表演，一如1986之馬勒當拿，點知差好遠呢，美斯豈止交唔到貨，仲係踢到有神冇氣㖭，究竟當中有乜原因，尚待研究。左丁山初步懷疑係與美斯先天體能不足有關，畢竟自少靠吃藥物調整體內增長荷爾蒙，幾難長期維持最佳體能在最高水平球賽爭雄。四年後美斯31歲咯，更難站穩高峰，美斯稱王時代，開始落幕了。