隔牆有耳:特警成唔認自己係警察 - 李八方

隔牆有耳:
特警成唔認自己係警察 - 李八方

狼英治下警方辣手處理遊行示威,令警隊民望創回歸17年新低。前一哥鄧竟成噚日出席火山探知館開幕活動,被問到警民關係轉差時,拋出金句撇清關係:「喂,我唔係警察嚟㗎喇喎!」八方追問有冇更好處理手法?佢答:「你應該問番警察。」仲慨嘆一句:「不在其位不謀其事。」想當年,警隊民望處高峯,李明逵未做一哥就話:「我生係香港警察,死係香港警察。」聽見特警成咁講,可見今時唔同往日咯。

特警成唔講警民關係啫,都肯講世界盃嘅。佢話好多屆冇睇世界盃,覺得隊隊踢法一樣,冇晒風格,朝早睇精華就夠。同場嘅環境局局長黃錦星喺烈日下演講,搞到胳肋底位置濕晒,搞爛gag話感受到火山熱度。八方問佢諗住點推三堆一爐?佢雙手握拳擺起「戰鬥格」,睇嚟預咗打場肉搏戰。
而噚日開幕嘅火山探知館位於西貢海濱公園,年初一、二休息外,全年開放,公眾免費入場。

環境局局長黃錦星 (右)出席火山探知館開幕,天氣熱到佢件衫嘅胳肋底位置濕晒。