錯你又唔認，認你又唔改，英格蘭嘅所謂中場新星韋舒亞，最近又俾傳媒影到佢喺拉斯維加斯食煙，仲同門將赫特一齊酒池肉林。英格蘭喺世盃分組賽墊底出局，班球員懶理咩知恥近乎勇，繼續度假狂歡！Fine，當你哋傷心得滯，要玩到盡咁散心，但韋舒亞，你記唔記得自己舊年講過咩？
話戒煙出爾反爾
咁就等我提提你，舊年10月，你韋舒亞當街食煙斷正，激到阿仙奴領隊雲格紮紮跳，佢話：「我完全唔認同韋舒亞嘅行為，作為球員，唔應該做啲損害自己健康嘅行為，我要私下同韋舒亞好好傾吓。」同雲格傾完後，韋舒亞認錯，「我唔係煙民，我同雲格解釋咗，件事已經解決，我諗嗰枝會係我嘅最後一枝煙。」一年未夠，韋舒亞就煙癮起，做番「韋煙王」，近日喺美國拉斯維加斯同朋友度假時，喺酒店泳池度，大啖大啖咁扯煙。
赫特餵酒毛管戙
除咗食煙外，韋舒亞都玩得好盡。佢叫朋友喺高處倒嘢飲落去口度，當玩吓雜技，算係小事嚟；但佢竟然同國家隊隊友赫特嘴對嘴，由赫特餵佢嘢飲，基味指數爆燈，真係睇到人毛管戙；另外，占士米拿亦在場。韋舒亞近年踢波完全冇進步，同出道嗰陣差唔多，前排史高斯先喺專欄話過佢，叫佢小心身體，唔好成日傷，搞到自己球技零進步。睇番韋舒亞近年嘅新聞，好波就冇踢幾多場，但成日聽到佢啲負面新聞，夜蒲、食煙、亂講嘢，到喺訓練場周圍屙尿都有。
韋舒亞由16歲開始已經俾人吹捧做英格蘭天才新星，但見到韋舒亞教極都唔聽，最怕雲格已經心淡。據報，阿仙奴有機會由皇家馬德里簽入德國中場基迪拉，到時條正選中場有阿迪達、艾朗藍斯、法米尼同埋基迪拉畀雲格揀，韋舒亞肯定無碇企。