「霞姨，我做錯啲乜啊？」
「我真係唔知你做乜啊，你累死我地啦！」
「霞姨，人地記者問我咪答佢問題囉，我做錯啲乜啊？」
「你講乜鬼嘢反中央啊？反佔中呀嘛！」
「都係有個中字箒。」
「我俾隻中指你好無？」
「我平時接開嗰啲戲好少有咁多對白，通常都係跳上論壇張枱，指手劃腳又收工。今次一時緊張，記錯咗。」
「你唔駛當住鏡頭話俾人知，『我一時記錯咗』㗎嘛。你要扮一個自發嘅、由內心深處討厭佔中嘅示威者，唔係死記爛背㗎嘛！」
「對唔住霞姨，因為平時背開對白都係『反中亂港』，所以一講個『反』字就想駁埋落個「中」字，我會小心。」
「仲有，你無端端講乜鬼張融啫！」
「因為我設計呢個角色，就想比較調皮啲，所以咪諗住講吓其他人名囉。」
「你知唔知一秒鐘有幾多格菲林啊？」
「24格。」
「你無端端講多句我支持張融，用多咗幾多格菲林啊！個客講明淨係要反佔中就夠，無話要sell張融㗎！你係咪靜雞雞收咗佢飯盒錢，幫人出聲？」
「無啊霞姨，就算真係有，我講唔出客戶個名，我諗佢都唔會出糧俾我啦。」
「你條出醜片段俾全世界係咁share，個客戶倒抽咗好多口涼氣，爭啲唔肯俾飯盒我地！」
「咁點算啊？」
「好彩我地一向同電視台個阿頭眉來眼去，佢即刻自動波，cut咗你出醜嗰啲對白，將你剪成一個為公義發聲的好市民！」
「霞姨，即係點啊？」
「咩點啊？以後記者訪問你，你叫佢唔好問咁多問題，反正問完都會俾人剪咗。」
「霞姨，你係篡改歷史、隱惡揚善、揮刀自宮……」
「你傻咗啊！盂蘭神功上身啊？」
「你cut演員對白，猶如殺人父母！我同你死過！」