對女球迷嚟講，未解通越位唔係問題，亦可以唔記得邊隊贏邊隊，都可以記錯邊個打邊個，但就一定唔會忘記感動催淚嘅場面，因為女人都係感性嘅金星人。
雷斯道歉最心酸
世界盃感動嘅場面有好多，首先我認為全隊身價加埋唔夠半個C朗嘅哥斯達黎加令人非常鼓舞，擊敗希臘晉級8強，球員賽後激動相擁，不但寫下歷史一頁，亦說明咗足球並唔係一個人嘅遊戲。然後要講哥倫比亞敗於巴西腳下，鋒芒盡露嘅占士洛迪古斯哭成淚人，更感動嘅係大衛雷斯「識英雄重英雄」，示意全場球迷向洛迪古斯鼓掌，男人之間，其實都有浪漫。而大衛雷斯喺輸咗七個一皮後，喺電視機含淚道歉（圖）：「我希望將笑容掛到每個人嘅臉上，我要用足球令大家快樂，點知結果竟然係咁。我對唔住全世界嘅巴西人。」都係教人鼻子同內心酸透。
足球，又點會只係廿個人追住個波嘅遊戲呢？期待下屆另一個悲喜交集嘅世界盃。
陳婉婷
太陽飛馬助教