世界盃曲終人散，但睇夜波得嚟一身疲累，唔可能即刻掃走，每日起身，疲倦嘅雙眼同身軀都唔想郁。物理治療師郭志堅今期雙管齊下，先按穴位再做提神小動作，吸引喺你一瞓醒可以即時喺床上做，包你做完醒神之餘，仲可以確保身心康泰。
記者：徐嘉華 攝影：方智傑
示範：陳嘉穎（香港長跑青年軍代表）
場地：ASA物理治療診所（中環）
1.按穴位
合谷穴：喺大拇指同食指嘅虎口間，好似兩座山中間嘅山谷，用另一隻手嘅拇指關節橫紋放喺虎口上（圖1），拇指向下壓，做30次，左右交替做3組，會有痠痠嘅感覺，呢個做法可以令你醒神，亦可增加免疫力。
太陽穴：喺前額兩側，即係眼眉位後有個凹陷位，可以用左右拇指指肚，按喺兩邊太陽穴上（圖2），可減少頭痛、頭脹等唔夠瞓嘅癥狀。
註：穴位每處按30次，做3組。
2.腳部運動
做完穴位按摩，如果仲未醒神，可以做以下兩款腳部運動，身體照舊瞓喺床上，雙腳屈膝，一腳向上伸直（圖3），腳掌上下擺動30次，做3組，可以增進腳部血液循環，更加令頭腦清醒；跟住做雙腳凌空「踩單車」動作（圖4），同樣做30次，可同一時間收腹，同埋增加腿部力量，返工返學都唔會腳軟軟。
郭志堅
註冊物理治療師
