為期大約一個月嘅世界盃賽事完結，大班球迷終於可以有覺好瞓，德國球迷更加係飲得杯落。而喺賽事期間，除咗商場、零食店受惠，蘭桂坊當然亦有得益。蘭桂坊協會董事方亮璇透露，今年世界盃舉行期間，蘭桂芳整體嘅生意較平日增長8%至10%，之但係，比起上屆南非主辦世界盃生意就減少5%。
呢個結果應該都係意料之內，事關華華之前跟蘭桂坊部份酒吧嘅老闆傾過偈，佢哋都話，今屆世界盃嘅比賽時間集中喺凌晨時段，好多場比賽都喺凌晨三、四點開波，佢哋早已估計，唔多人會喺半夜兩、三點落酒吧睇比賽，預咗今屆世界盃對生意幫助唔大，好多連收費電節頻道都冇買㖭。
唔知四年之後喺俄羅斯舉行嘅世界盃，氣氛會唔會熱烈啲，幫蘭桂芳推一推高個生意額呢？