好多年前，孫柏文仲係《蘋果》全職撰稿員時，有次打風翌日放工上公司巴士，同個喺港聞版做編輯嘅同事傾起。我話：「點解係都要用趁火打劫去形容啲喺八號波仲肯開工，不過收得貴嘅的士司機呢？搵命搏呀！如果係都要政府拉呢啲司機，咪分分鐘連車都冇？」編輯同事答：「我都明。」跟住就嘆氣一聲。
用價格跳動，去令需求同供應得到平衡，連中四生都識。不過如果需求多過供應，要加幾多呢？如果掉轉，又要減幾多呢？仲要每人每程都唔同時，用乜價去配對乘客同車呢？咁一路以嚟，都係靠經驗去估估吓，一路都有人會喺打風時post「加三百都冇車！」咁喺兩個禮拜前，我就寫咗篇題為「一注獨沽的士牌」嘅文，話要沽的士牌嘅原因，係有間叫Uber嘅載客車公司會殺到來港。你只要用Apps就可call佢哋啲車，而最煞食嘅係用電腦計浮動價錢去配對客同車。喺美國試過因大暴雪，所以比平時收貴六倍，不過就一定有車。佢哋要做到就係每刻每架車都載緊客就成功，可令運輸三大成本中嘅司機、車價，得到就大發揮。Uber平、靚、正到點？世界各地的士司機、牌主上街示威，向政客施壓要禁Uber，有如余若薇喺Solar一案打壓外來大狀一樣。喺舊金山嘅乘客搭車多咗，不過傳統的士每更收入以每年計已跌一成，如果香港一樣，700萬元一個市區的士牌岌岌可危。
自閹浮動價格設定
近日美國傳來話Uber抵受唔住壓力，卒之要自閹。紐約啲的士牌主明白Uber多fans，冇得直接禁，所以就打「浮動價格」主意，佢哋收買抽水議員，又叫啲正義上身記者話冇車時「趁火打劫」。所以Uber亦宣佈會為浮動價格設上限，最需要車時會冇車，重返鬥打電話鬥jam線時代。估唔到Uber喺我讚佢哋冇十日，就已自閹。唔通睇透世事嘅就係嗰啲揸住好多的士牌嘅人？唔通要靠好似GoGoVan呢啲公司先能推翻搭車現狀？
孫柏文
獨立股評人
http://facebook.com/shuen
本欄逢周二刊出