學民思潮召集人黃之鋒嘅DSE成績變咗全城焦點，雖然佢達到大學收生最基本嘅要求，不過為穩陣起見，都係報定城大副學士，未來兩年或者要深入「梁營」喎！唔少網民同名人都安慰之鋒，認為佢已做得好好，如果成績未如理想係因為搞社運而受影響，其實要慚愧嘅，係呢個社會嘅大人。
之鋒唔想講成張成績表嘅成績，只係話中文4級，其中說話同聆聽考試都有5**級，而佢最擅長嘅通識有5級，但無緣摘星，佢對呢樣嘢好失望，所以會向考評局上訴。不過，佢喺通識科一份叫獨立專題探究嘅功課，以反國教為例，探討未成年人士參加社運嘅情況，結果拎咗滿分。
網民：你才是香港狀元
噚日上晝7點開始，已有記者喺之鋒位於觀塘嘅母校守候，後來有人喺城大見到佢現身，原來佢去咗報城大副學士，已被公共行政及管理副學士課程取錄；後尾再有人喺樹仁見到佢報名。
日後之鋒或喺城大讀書，深入梁營喎，好易撞到梁粉，例如城大校董會主席胡曉明、「鼠王」城大法學院副教授梁美芬等等，會唔會有排煩呀？佢話只要行得正、企得正，冇有怕。學民未來一年要繼續推動普選，所以佢唔會退出。
噚日之鋒同周庭合共接到逾百個傳媒來電查詢成績，佢哋諗住一齊喺城大現身，答完就返屋企，點知吸引咗起碼40名記者，忽然間變成記者會，兩個同學仔都好尷尬。
有網民留言畀之鋒話「辛苦你，你才是香港的狀元」，又有網民話「自己成績、自己知 ……指摘人嗰啲，撫心自問，換轉係你，17歲，你受唔受到呢種壓力？」武俠小說作者喬靖夫都話，如果之鋒交唔出亮麗嘅成績單，係因為搞社運而受影響嘅話，「我告訴你，要慚愧的不是他，是這個社會的大人」。
李八方
mailto:[email protected]