自2010年起，每季都來港客串的英國騎師郭能，上季共贏出27場頭馬，且更憑「將男」捧走個人在港首場一級賽勝利遮打盃，較之前三季頭馬數目總和還要多一場，佢話新季為了四個「男」放棄英國策騎基地，首次全季在港策騎，冀望成績再進一步，唔可以衰。
過往郭能完成季中三個月客串期，便離港返英，不過上季卻改變主意，申請續牌至季尾，佢解釋說：「我有太太及三個囝囝，每次到不同地方策騎，都會全家『移民』，既然家人已習慣香港生活，我哋唔想再飛來飛去，所以決定新季在港騎足全季，我可專心工作爭取好成績，家人亦不用太漂泊。」
除了自己三個囝囝，還有一「男」驅使郭能留港，他說：「從『將男』外地賽績及陣上跑法，都顯示佢有長力應付2400米，但遮打盃賽前，我實在預計不到牠有能力擊敗馬王『威爾頓』，估不到佢沿途走勢輕鬆，直路越騎越有，可以彈離贏馬，『將男』新季才六歲，肯定仍在高峰期，此類頂級馬一季總獎金閒閒哋幾百萬，甚至過千萬，如我續獲帥權，從中隨時分得過百萬獎金，當然不可隨便放手。」