2013/14年度賽馬在7月6日結束，下季賽馬在9月14日開始，至2015年7月12日結束，全季賽馬共83次。
前星期日結束嘅馬季，創下歷年投注紀錄，總額高達1,019億（已包括越洋轉播賽事），比舊紀錄，在1996/97創下嘅923億元，曾保持17年，卒之被超越咗嘞，不過那一年全季賽馬595場，平均每場投注額有1.551億元，上季本地賽馬場次共771場，如不計越洋賽事，即每場投注額達1.3億，故此以每場平均投注額計，17年前嘅紀錄仍然係最高。96至97年馬季時，香港經濟空前興旺，當年馬迷投注十分狂熱，上季雖然每每有大戶／幕後人臨場瘋狂落飛，動輒以百萬元計，但每場投注額仍是無法創出新紀錄。顯示一般馬迷投注額下降。
舊紀錄好，新紀錄也好，完全唔關左丁山事，因為自己年年嘅投注額都差唔多，頂多有些微增幅，所謂小注怡情吖嘛。睇番啲公開數字，可知96/97年係不可思議嘅一年，當時馬場並無內地馬迷，無內地人投注，極少海外投注，923億元真金白銀來自本地馬迷，馬會宜注意及之，因今天馬會有人負責催谷投注，招呼貴賓大戶嘅高層唔駛咁歡喜住，破96/97嘅平均每場投注額，尚未成功呀，即使打破亦要起碼高出兩至三成先至係真的打破，因當年科技未有咁發達（如互聯網手機投注）及海外豪客呀。
唔講錢，講競爭，上季亦有感人之處。前季練馬師冠軍爭奪戰十分激烈，要去到最後一場賽事，葉楚航先至可以擊敗告東尼。今季呢，又係一樣，方嘉柏本來落後蔡約翰十幾場，但今年知道老父方祿麟患上淋巴癌之後，發憤安慰老父，最後三個月拼命追趕，卒之在7月6日去到第十場，憑「準備就緒」取得第二，而全季頭馬打個平手（各62場），就以多一場亞軍（59對58）之微，贏得練馬師冠軍，頒獎時攬住父親錫一啖，場面動人。在7月4日晚之「賽馬會冠軍人馬獎頒獎禮」，左丁山與方嘉柏同坐一席，因以前新亞校友團體嘅「上下四方」曾養在方廐，與佢相識超過十年，故舉杯預祝佢可奪得練馬師冠軍，方仔苦笑：「It will be very hard」係困難嘅，但佢卒之做得到，係有料練馬師嚟嘅！