肥頭：福嬸，唔該凍奶茶，餐蛋丁！
福嬸：冇喎。
肥頭：咁沙嗲牛麵有嘞啩。
福嬸：都冇喎。
肥頭：福嬸，你係唔係玩嘢呀？定以為我冇錢畀呀，係就係巴西搞到我輸唔少。
德叔：唔關福嬸事，係大廚成同水吧強都「射波」，拎咗病假唔返工，佢兩隻死嘢一定係睇通宵起唔切身，就直頭唔返工啦。原本我都想唔開鋪，不過因為要收貨，焗住開，呢度有個杯麵，請你食頂住肚先。
肥頭：唔怪得我今日由屯門出旺角返工，條屯門公路鬼咁順暢啦，我估好多人都係咁「射波」。
艇仔張：一個月世界盃話咁快就完，德叔，你埋單計數贏定輸？
德叔：原本都執多少，不過聽個死仔肥頭講，決賽買大波膽，點知整個0:0，就梗係輸啦。
艇仔張：咁又唔好怪肥頭，雖然場波法定時間冇波入，都唔算悶波，好多攻門㗎。
德叔：好彩我90分鐘完場後，就買番個德國（圖）拎冠軍賺番少少，原本以為佢哋射12碼先贏，點知完場前幾分鐘葛斯仔幫我搞掂。艇仔張，你又點？
艇仔張：我一向主張大賽買下盤，決賽中咗下盤加個和波，叫做贏番個泰國5天團。
肥頭：你幾時去旅行？英超就開喎。
艇仔張：係呀，英超8月中就開，𠵱家踢緊友賽，世界盃決賽之前幾個鐘，曼城就踢友賽，結果輸埋畀登地，所以呢啲波都好多陷阱，繼續捧下盤有着數。
人物介紹：
德叔——旺角茶仔老闆
肥頭——吹水怪
祥Hi——肥頭屋村老友
福嬸——茶餐廳侍應
艇仔張——扮專業賭友
大食肥牛——賭精一名，命中率甚高