世界盃終於踢完喇，返到嚟見到個悶市都唔知炒乜好，諗住即日鮮執幾格，喺唔夠瞓情況下，總係輸多贏少。終於踢完喇，冇得再賴，係時候做吓功課，搵定啲潛力股等下半年大爆發。雖然戰友都掛住睇波，大市發生過乜事都未必知，但應該都會留意過去一、兩個星期有新股上市，上星期已經有14隻，魏力估大家應該都噏唔出啲公司名。
今日要推介嘅都係一隻半新股，就係中國北車（6199）。5月底上市嘅時候完全冇人理，超購1倍都唔夠，好多戰友連個冧巴都唔知，上咗市之後都係徘徊喺招股價附近，不過踏入7月之後就突然發威，累積升咗兩成。鐵路呢個板塊真係好耐冇炒，去年阿爺開始打貪，鐵道部係首當其衝，搞到變咗長期跑輸大市。早啲被整頓，亦有可能就早啲翻生，上星期發改委出咗個「鐵路發展基金管理辦法」，將發展基金規範化，有助引進社會資金，填補幾千億的巨大資金缺口，對整個行業嚟講都係好事。只要市場重新審視呢個板塊，下半年隨時升到你唔信，雖然股價近期累計升幅不少，戰友可考慮在6至6.2元收集，7蚊應該只係首站，之後應該會一路向北。
魏力
http://www.facebook.com/2012jason