金融發展局舊年初成立時，定位為政府諮詢機構，經費由財經事務及庫務局調撥，簡言之就係冇乜錢可以畀佢花費。金發局主席查史美倫噚日約埋一班傳媒高層食晏時都拎呢樣嘢出嚟講，指金發局冇乜錢，平時約市場「持份者」食飯摸底都係食三文治。
既然係咁，點解噚日咁破費，請傳媒去金鐘海都食晏呢？其實傳媒都可以食三文治㗎喎，對傳媒嚟講，食咩唔重要，最緊要係有料收。
梁振英為兌現競選承諾，初時將金發局講到係威係勢，最終金發局變成財庫局轄下諮詢機構，冇全職僱員，秘書處四人分別由財庫局、證監會、金管局同埋貿發局借調，運作三年後，政府先至再檢討。
既然冇乜經費，金發局平時想搵埋David Webb、證監會或者券商代表等持份者食飯摸底，當然都要慳住使啦，查太仲透露，跟呢班持份者食飯只係食政總Canteen嘅三文治㗎咋。