晨訊科技（2000）啱啱公佈咗上個月超級靚仔數據，現價仲係潛喺近八年底，手機設備股當中，晨訊超殘，博翻身，絕對有得諗。
晨訊主打手機解決方案、無線模塊同顯示板塊。今年上半年，連埋物業收益嘅總收入9.25億元，同比增加咗17.6%。仲要咁睇，若果再拆細晨訊收入分部，今年上半年，晨訊嚟自手機電訊主打業務收入，達到8.7億元，增幅更加達到21.4%，主打瓣數收入增幅，仲靚仔咗。
今年業績勢翻身
上年，晨訊將輸得慘烈嘅手機外殼廠逐步關閉，放棄原用解模屏G+F生產線。喺咁嘅情況下，主打業務收入反而有增無減。一嚟，相信係晨訊止血及時；二嚟，集團加快增加手機高端ODM業務，令到收入turn around。
晨訊家陣煲緊「物聯網」，呢瓣業務，用途好廣泛，由智慧城市、交通、民生以致到工業安全，全部用得着，而據外國權威預測，物聯網產業比互聯網仲要大幾十倍，衍生規模斷萬億元計。晨訊亦喺上年成功開拓咗海內外高端客戶，呢瓣一擊即中，晨訊有排唔使憂。
咪扯咁遠，晨訊上年唔靚仔瓣數，狠撇過億元，亦因為咁，大見紅出血1.26億元。
今年再冇呢啲撥備，加埋4G對產品有刺激，而晨訊上半年收入數據有板有眼，估佢今年業績會翻身。
晨訊現價（0.395元）潛喺八年水底，比起2005年上市價1.7元，跌咗75%，比起06年高位3.8元，暴跌咗90%，PB得0.54倍。
近磅通達（698）兩倍，已經變咗飛彈嘅飛毛腿（1399）都上到0.9倍。買晨訊，PB追番上飛毛腿，要見0.67元，講緊要升70%。
錢雋
細價股專家
本欄逢周二、三、五刊出