亞視因為拖欠股東查懋聲同查懋德兄弟3億元，俾佢哋申請清盤單案，擾攘咗幾個月，噚日終於解決，查氏兄弟收齊欠款，高院亦都頒令正式撤銷單案。鼻哥發炎嘅亞視執董葉家寶喺庭外笑晒口咁話，歷史遺留嘅小插曲終於解決，亞視員工會好開心，今後會「更上下一心，大踏步向前！」
亞視喺呢兩個禮拜，先後還咗查氏兄弟可換股債券嘅2億元本金，同埋4,700幾萬元利息。葉家寶講完心情，不忘透露亞視嘅未來大計，包括9月開拍3部中港合作劇，仲話其中一套青春偶像劇《女神辦公室》，會喺內地手機同網絡平台同步播，肯定幫到亞視藝人返內地發展喎！
案件編號：HCCW103/14