喺今屆世界盃奪得季軍嘅荷蘭，已經返國。不過，佢哋嘅教頭雲高爾就馬不停蹄，休息兩日之後就會飛去曼徹斯特履新，帶領曼聯迎接新一季。雖然雲帥自己唔使唞，但佢都好體恤麾下球員，畀荷蘭兼紅魔嘅前鋒尹佩斯休息3周先歸隊。
荷蘭喺今屆世盃表現唔錯，雖然人腳唔算話好強，不過都可以奪得季軍；而「橙衣兵團」嘅大軍已經喺周日返到荷蘭，當然受到國民嘅熱烈歡迎啦，喺機場見到一片橙海，迎接呢班人民英雄。
今屆呢隊荷蘭，無論老將定係年輕球員都有好好嘅表現，其中古積特可以話係搵到第二春，洛賓嘅表現更加令到佢得到世盃銅球獎，連華亞爾都踢出超水準，表現非常穩健；年輕球員方面，戴利白蘭特、韋拿杜姆、迪比等等都表現出色，令人十分期待佢哋喺兩年後歐國盃嘅表現。
紅魔15/16球季轉三間
不過講到今屆荷蘭陣中最出位嘅，就一定係教練雲高爾啦。呢位候任魔君完成喺荷蘭嘅使命後，休息兩日就會即刻飛去英國執行曼聯嘅職務，喺英國留低唔夠48個鐘就會隨隊去到美國加州備戰。雲高爾係第一個非英倫三島籍嘅曼聯領隊，新人事新作風，球會即刻就簽到三間牌做球衣新贊助商，仲簽咗10年總值7.5億鎊嘅肥約，破咗足球界嘅紀錄。不過紅魔喺14/15球季都會繼續着一剔牌波衫，15/16球季先會正式轉為三間。雲帥話：「我唔需要假期，能夠接受咁大嘅挑戰真係好令人興奮。我只係同兩個新同事見過面，係時候要去了解球會更多嘅人。」睇嚟佢對於呢份工真係好有熱誠喎！
特賜尹佩斯3周假
另外，雲帥嘅愛將尹佩斯為荷蘭打到入4強，所以佢特別畀咗3個禮拜假期呢位荷蘭隊長，希望佢可以唞夠，下季踢曼聯sharp啲！繼隊長尼曼查維迪轉會國米後，副隊長艾拉都會轉投祖記，所以曼聯需要一位新隊長。雖然朗尼覺得自己係最適合人選，不過始終尹佩斯係雲帥愛將，所以由呢位前阿仙奴隊長做紅魔隊長，都不足為奇。