立法會噚日朝早9點續會，繼續審議樓市辣招；雖然唔少議員通宵睇完世界盃決賽就返去開會，但現場卻離奇冇乜「熊貓眼」，民主黨單仲偕就係其中一個，噚日佢喺立法會滿場飛，不知幾咁神采飛揚，一啲捱夜迹象都冇。
鬼咩，單仲偕係德國球迷，贏咗波心情靚就自然醒神啦！佢噚日仲專登着件德國波衫去立法會開會，賀一賀德國隊捧盃。
單仲偕話，件波衫係2006年德國主辦世界盃時喺柏林買嘅，所以個款有啲舊，但勝在別具意義。講番場波，佢話同細仔齊齊安坐家中睇賽事，但囝囝查實係阿根廷「球王」美斯嘅擁躉，兩仔爺成晚打對台，睇波不知睇到幾肉緊。