過咗冇波睇嘅一個晚上，少咗啲花生薯片汽水雪糕，多咗啲睡眠同工作壓力，隨住生活回歸正常，係咪感覺唔捨得世界盃呢？大家開始掛住啲靚仔球星未呢？例如尼馬、美斯、占士洛迪古斯？
走寶、不捨
諗吓諗吓，呢班當代紅星或耀目新星之中，其實大部分都仲會喺下屆世界盃繼續同大家見面，唔洗擔心冇機會再睇。相反，一眾魅力不凡嘅老將就好大機會啱啱完結咗佢地球員生涯嘅最後一屆世界盃，唔知佢哋嘅感覺又會係點呢？喺球迷角度嚟講，不禁覺得走寶、不捨。
門神保方風靡全球
例如意大利嘅派路同保方（圖），風靡全球球迷。仲有破朗拿度喺世界盃入球紀錄嘅德國中鋒高路斯；荷蘭陣中由前鋒踢到中場再轉型做後衞嘅古積特；當然唔少得港人至愛嘅林柏特同謝拉特，更可惜嘅係英格蘭仍未搵到佢哋嘅接班人。咁多個一代巨星，告別咗佢哋最後嘅世界盃，令我哋更為掛念！
陳婉婷
太陽飛馬助教