前晚半夜唔少球迷都眼定定望住部電視，好想知德國同阿根廷邊一隊捧走大力神盃。田北辰亦有坐定定睇呢場世紀大戰，但眼光卻不時由電視轉至手機，𥄫手機內嘅靚相！邊個令佢咁分心？咪就係外孫仔囉！
原來田二少嘅大女前日晏晝入醫院，男外孫準備隨時出世。田二少話當時仲估緊，乖孫會唔會凌晨先肯畀公公見呢？仲準備好為孫仔放棄觀賽。點知孫仔非常「識做」，夜晚十點就呱呱墜地，母子平安，田家上下都欣喜若狂。田二少話同孫仔見面初相識後，返到屋企梳洗時間啱啱好，趕得切睇波，但不由自主㩒手機嘅孫仔相回味，榮升外公嘅佢笑稱心不在焉都係人之常情。